超人李嘉誠上周五因病缺席長和（001）與長實地產（1113）股東會，學「小超人」李澤鉅話齋，「請日病假啫，唔使退休呀」。但似乎有小股東真係想超人退休，長實竟然有6%小股東反對超人連任董事。但比較番，最多小股東唔like嘅華資企業老闆，應該係東亞（023）主席李國寶同新世界發展（017）主席鄭家純。
88歲嘅超人係長和系嘅靈魂人物，佢每句說話對公司或社會都舉足輕重，照計小股東冇理由想佢退休，但偏偏今年長實有6%小股東反對佢連任，舊年長和仲多，佢有近一成反對票㖭。邊個咁玩法呢？
有市場人士分析，好多時啲基金都係跟顧問公司，如ISS嘅投票建議，懶理重選嗰位係超人定係蝙蝠俠。加上李嘉誠今年88歲，部份股東想佢退落嚟都唔出奇。事實上，79歲、有「長江一號」之稱嘅李業廣今年都有32%小股東反對佢連任長和董事。
李國寶反對票近三成
不過超人又唔使傷心嘅，睇番其他華資上市公司，有啲老闆更加唔得小股東歡心，76歲嘅東亞主席李國寶就係佼佼者，鬼咩，佢叫人唔鍾意就賣咗東亞啲股份（其實咁講都冇錯），近年又俾國浩、Elliott Capital挑機，佢嘅反對票點會少，今年有近30%都冇懸念喇。
拍得住寶哥哥嘅，就係成日俾人話有management discount嘅新世界，68歲主席鄭家純2013年有28%小股東反對佢連任，舊年好啲，得12%反對票。睇嚟佢哋都要加把勁冧股東嘞。
李華華
mailto:[email protected]