拜仁慕尼黑破紀錄成為德甲四連霸後，成班球員禮拜日同埋贏咗今屆女子德國聯賽冠軍嘅女子隊成員，齊齊現身市中心廣場露台，同近萬個粉絲齊齊慶祝。
拜仁女子隊雖然喺禮拜一先踢煞科戰，但因為佢哋已經提早衞冕今季女子德國聯賽，所以獲邀同一班男子隊成員喺禮拜日同成萬個粉絲一齊慶祝孖住成為德國球壇嘅男、女子第一。佢哋主席路明尼加就話：「每年都係咁正！就算我哋唔係四連霸，只要贏到冠軍，感覺一樣咁特別。」至於今夏就會轉投英超曼城嘅拜仁教練哥迪奧拿，繼上周六喺安聯球場嘆完啤酒浴，禮拜日亦帶埋家人嚟同粉絲慶祝兼道別。
約定捧完德盃再聚頭
拜仁嚟緊禮拜六會喺柏林奧運球場同多蒙特踢德盃決賽，如果贏到做埋雙冠王，佢哋下個禮拜日仲會返市中心廣場再同粉絲慶祝。路明尼加咁講：「若然我哋喺柏林捧走德盃，我哋會喺下周日返嚟呢度囉。」