迄今好多人唱淡「L型」經濟，小弟睇完上星期內地M2數據後，竟然轉咗睇法。
踏入2016年，中國M2增長幅度逐步收縮，4月增幅剩12.8%。M2增長收縮可能係因，「L型」經濟可能係果，喺中間過程，可以描繪一條出路，希望不是小弟一廂情願。
過程係咁，M2增長放緩至正常水平，殭屍企業只能靠再融資續命，銀行同時逐步為殭屍企業撇賬，令信貸增長逐步收縮，從而令經濟失去活力，可令「L型」經濟真正出現。
同時，以新經濟、優質民企嘅收入動力去逐步填補國企嘅收入空缺，長遠透過正現金流去逐步消化多餘M2，的確需要一段非常長時間先能令經濟重拾正軌，但可能係解決問題嘅可取方法。
當然，仲要過一批紅二代、官員一關，因上述「L型」發展，肯定令佢哋冇啖好食，長遠貪腐空間大大降低，問題係，只要掌握軍權嘅習大大及政治局，可以控制人行嘅意志的話，樓下班人想貪都貪不來。變相係一種打貪，效果卻好過直接打貪而引來四方八面反抗，亦更有力阻止金融體系爆煲，換來中國長遠經濟不景嘅痛楚，行到呢一步，已經算賺。對股市影響，下回分解。
晉佳
http://www.facebook.com/advanceguy1