一傳打假波，球員都當堂醒醒定定，好似西甲傳出上輪華歷簡奴（圖）作客輸畀皇家蘇斯達1:2場波係打假；結果皇蘇上周五煞科戰已經贏波，到咗周日，賽前排尾二嘅華軍踢護級生死戰更加唔會放鬆，由柏保路靴南迪斯、祖沙比特同米古各建一功，3:1擊敗篤定降班嘅利雲特。可惜同日希杭主場2:0搞掂維拉利爾，令華軍贏波都救唔番，同作客1:2不敵貝迪斯嘅基達菲，兩支馬德里球隊齊齊降班。好彩來自馬德里嘅雷加利斯（CD Leganes）暫列西乙榜首，仲有四場未踢，升班機會都幾高，起碼下屆可以陪吓皇馬同馬體會踢吓馬德里打吡戰。