以前，香港仲係中央領導要定期傾嘅議題時，唔知係自己來，定係有擦鞋仔，一路都想「統戰」本地傳媒。諗住一統戰到，就可方便管治。
孫柏文唔講對與錯，純粹分享點搵錢。首先，喺亞視執笠一役睇到，唔係咩香港傳媒都值錢，甚至要「統戰」嘅總體價值，隨住周凱旋句：「以前80年代，我哋佔中國GDP廿幾巴仙，家陣連三巴仙都冇，香港人思維要變。」都要下降咁改變。
我知，南早（583）賣畀馬雲賣到好價，有如仲有人睇南早咁。不過呢種價真係好難再現，因不但香港佔中央嘅mindshare下降，仲有香港對外軟實力亦被填鴨式教育，令各行各業新星絕迹。我企喺馬拉賓州某個有好多餐廳嘅街角，見云云殘體字大橫幄海中，有張曬到甩晒色嘅蔡瀾海報。寫照呀。
最後，當然係香港傳媒觀眾、讀者群散晒。香港最有影響力嘅傳媒，亦都係大多數香港每日首先接收資訊嘅地方，就係佢哋自己條facebook newsfeed。誰可控制乜嘢喺你條newsfeed出現，就係最影響你嗰個，即係香港最有影響力嘅傳媒大亨，就係fb老闆Mark Zuckerberg。佢直情可左右香港選舉結果。而如果擁有fb就係力量，最大股東，亦係香港人邊個？就係擁0.8%股權（值約240億港元）嘅李嘉誠。Who has the last laugh now？
孫柏文
獨立股評人
http://www.facebook.com/shuen
本欄逢周二刊出