當年睇電視節目「飛黃騰達」個有錢佬Donald Trump，今日變咗做美國政客特朗普，主打議題，繙譯做香港人嘅語言，就係本土，總之，本地血緣、膚色或者價值觀嘅人優先，其他人就用另一個尺度去量度，完全係左膠大愛嘅另一個極端，一啲都唔難明。
本土風引起共鳴
比較難明係，點解美國有特朗普，最新菲律賓又有個「菲律賓特朗普」當選，而我哋香港人咁易明特朗普，係因為我哋都有本土派，立場同特朗普都有幾分相似，連埋歐洲撕破左膠面具，唔再大愛包容難民，由開始送客一刻，已經證明轉咗風向，同美國、菲律賓、香港一樣，都係吹本土風，而啲人又會有共鳴。究竟點解？
就咁話「全球化資本主義壟斷」，一來太左膠，二來只係喺度背書。真正原因係，全球化到今日呢個地步，市場贏家已經明顯跑出，企業與其同佢爭，不如做佢下線，拍埋一齊做生意。新競爭難以加入嘅時候，冇公司需要大量搶員工，入到大公司做都只可以安穩咁𢭃糧，入唔到大公司就搵食艱難。全球化商業環境接近，大家都覺得中國、印度、墨西哥之類搶咗自己份工，加埋移民難民湧入，日日見到篤眼篤鼻，一爆就全球都要本土。
就算新經濟、科網都已分勝負，蘋果、Google、facebook已經做咗頂層，搞科網再叻，家陣都係做被收購嘅角色，例如做到WhatsApp、Instagram，最後都係被收購。中國因為個市場圍住，自成一角，但係騰訊（700）、阿里巴巴、百度都已經成為贏家，想伸隻手入去都難。
高明覺得聯儲局多年量寬低息，打破咗以前穩打穩紮做生意手法，反正有人印鈔頂住，做生意一做就豪氣咁使錢，開業就燒一大叠銀紙，唔諗點賺錢，先搶晒個市場，好多行業都變成贏家全取，第二同第一相差太遠。本土小資本生意沒落，又返去仇視外來者嘅惡性循環。可能亦都係因為咁，連股神畢菲特都轉玩資本密集行業。一般人，喺炒股票嘅一面嚟講，係一件好事，因為可預見性較高，資金跟實全球化得益者，賠率未必太高，但贏面會比較大。
對於打工創業嘅另一面，就冇咁好，因為贏家都搶個市場搶得七七八八，競逐好員工意欲唔大，唔會成日高薪挖角，打工薪酬唔會有爆破性增長；唔心足，想創業，但係各行各業都已被贏家搶得七七八八，創業一係冇市場，一係成功就被資本雄厚嘅公司抄襲，然後燒銀紙搶市場，跟住贏家全取。冇咗階級流動嘅希望，營營役役咁打工，所以咪覺得外來者爭飯食，先要本土囉！
高明
http://www.facebook.com/bigricetea
本欄逢周一刊出