利福（1212）主要經營崇光百貨（SOGO），老闆劉鑾鴻（細劉）嘅大女劉今蟾今年3月先至升做執行董事，最近市場已傳出，細劉打算集中精力打理就快分拆上市嘅利福中國，將香港生意交畀阿女全權負責。
利福主要經營香港崇光與內地久光百貨，細劉𠵱家係利福主席兼首席執行管，公司計劃將久光百貨分拆為利福中國上市。根據利福中國上月向交易所遞交嘅初步招股文件，假如利福中國今年成功上市，細劉就會調任利福非執行主席，集中管理利福中國。
細劉集中打理利福中國
利福財務總監潘福全接受查詢時承認，細劉將退出管理香港崇光，因「劉生個人覺得要花多啲時間喺中國業務」，又提到香港崇光營運成熟，而且翻新工程接近尾聲，業績、客流比較穩定，店長對分店相當了解，可以應付到。
咁細劉唔管香港，由邊個管呢？消息人士透露，年僅28歲嘅劉今蟾，將會接替爸爸，擔任利福首席執行官，管理香港崇光百貨嘅日常營運。細劉主力做利福中國主席與行政總裁，兩間公司之間冇高級管理人員重疊，確保獨立管理運作。
對於太子女係咪更上一層樓，潘福全回應話「𠵱家唔公佈住，未定，暫時冇公佈」，但佢強調，劉今蟾已經加入崇光一段長時間，意指太子女熟悉公司業務運作。的確，劉今蟾2012年已加入利福，現負責國際品牌與銷售推廣，但就比較怕醜。
李華華
mailto:[email protected]