更生人士背後嘅故事唔簡單，社工為咗協助佢哋，除咗幫更生人士四處張羅外，有社工夥拍時裝設計師，將更生人士嘅起跌故事畫喺T恤上，並透過網上商店賣衫講故事。呢個意念獲「社會創新及創業發展基金」投資10萬元，並得到懲教署垂青，一起為更生人士透過衣裳勵志。
獲社創基金資助
社工出身的冼曉嵐（Ophellia），兩年前到監獄為在囚人士提供輔導服務，與其中一位在囚人士互相通信，有一次對方將自己嘅感受畫成一隻熊仔，Ophellia大為感動，覺得不少在囚人士有不少才華，故事感人，認為大可以將更生人士的故事化成圖案印在T恤上，並透過網上商店售賣。一件T恤嘅售價為395元，網址為www.unspoken.news。
Ophellia話會搵嚟設計師、寫手採訪更生人士，將佢哋嘅故事化成圖案和文章，衫上印上二維碼，上網便可知道圖案背後嘅「更生故事」。呢個項目獲社創基金睇中，而基金噚日宣佈首批25個獲得資助嘅創新項目，總資助金額為1,000萬港元、料惠及2.5萬名弱勢人士。