辦婚禮收人情好似天經地義咁，對單身人士公平咩？咁又無得咁計嘅，本來賀親朋共諧連理，送上一份心意，唔應該係負擔，不過英國有對夫婦竟然在婚禮後發電郵給一位前同事，表示「你付的人情似乎不足以表達你對我們的溫暖祝福。」暖？直頭火滾啦！
嬲到着火的事主於是上網求各位大神協助，問大家如何回應而不失霸氣。以為事主做了好少人情？原來支票銀碼都有成100英鎊，以前同事來講，數目一啲都唔失禮。事主話對方電郵首先講好高興見到各位賓客，不過下一句就話好詫異閣下出手唔夠多，如果你想調整一下我哋會好感激咁話。
網友個個被撻着，有人教事主不要為支票入數，然後回覆：「真係唔好意意，你掉咗嗰張支票佢，我再送上另一張。」然後給他們10便士的支票。又有人提議寄張大銀碼支票過去，不過唔簽名；或者話佢知自己去佢個婚禮花咗幾多車錢，開番張單要對方找數等等。
當人「情」用錢來量度，份情本來就已經好薄下，奉勸各位即將拉埋天窗人士，人情係人哋畀，架就唔好自己攞來丟！
記者：葉青霞
資料來源：mumsnet
