上周五主板沽空比率18.37%，創18年新高。睇番2011年9月、2012年5月、2013年6月同2014年12月，沽空比率都現破頂之勢，前三次沽空比率破頂前，恒指都係處於短線跌市，但沽空率破頂後，恒指非常接近見底，後出現V型反彈，除2014年12月一役例外。留意，2014年12月沽空比率破頂，當時恒指並不處於短線跌市，而係上落市階段。適逢今次係跌市，如重覆過往趨勢，港股今次沽空率急升，便接近見底時。
上周五沽空盤集中喺下半場，單計午後主板沽空金額達72.35億元，佔主板成交309.9億元嘅23.35%，即每4蚊有約1蚊成交來自沽空盤，如撇除窩輪牛熊證，每3蚊正股成交，就有近1蚊來自沽空盤，前所未見。
沽空成交嘅特質係防守力極低，因理論上短期股價唔繼續跌，就要補倉逃命，守都冇位守。沽空盤多到咁，反映消耗咗唔少淡友力量，如果周一、二港股回穩，向上挾淡倉動力可相當驚人，至少嗰72億元沽空盤嘅補倉動力已不得了。
恒指9 RSI最近形成四底背馳，然後急跌至超賣。比較過往短期跌市嘅RSI走勢，目前應接近底部，觸發入市條件。小弟認為，只要港股今日守得穩，已經值得掃貨。
晉佳
http://www.facebook.com/advanceguy1