政治一日都嫌長，曾經講過N屆唔會選特首嘅梁振英，𠵱家已經穩坐特首之位，轉眼出年又到特首選舉。同樣之前喺訪問話唔選特首嘅政務司司長「奶媽」林鄭月娥，近期亦頻頻有動作。日前佢率團上四川，總結香港援建汶川嘅工作，已經有政圈好事之徒同林鄭備選特首拉上關係，更加耐人尋味嘅係林鄭喺四川期間，私下邀請隨團嘅15個傳媒高層飲嘢談心，更加令人覺得呢次四川之行唔係簡單。
有幾個政圈好事之徒同八方講，原本林鄭約團友飲嘢傾偈冇乜奇，但佢哋聽聞呢場聚會冇請其他隨團人士、連同行官員都冇去。席間林鄭雖然冇提會選特首，但言談間就講到目前政府不足，以及有乜政策可以提出等，有政圈好事之徒仲話似足參選政綱發佈會，所以唔少人話呢個聚會點止吹水咁簡單，認為林鄭一來要拉攏傳媒高層，二來係講吓施政理念，聽吓大家意見。
設宴回帶習握手舊照
當然亦有政圈中人同八方講，司長同傳媒坐埋，唔講政府施政咁講乜？大家唔好諗多咗！但另一名政界人士話，林鄭喺四川被問到選唔選特首，冇再斬釘截鐵否認，反而似是而非咁答咗句：「我12、13個月後先答你呢個問題。」
再加埋林鄭有晚喺成都設宴答謝嘉賓，佢席間分享照片，其中一張竟然係佢2008年做發展局局長，代表港府去四川賑災，同時任國家副主席習近平喺工作會議前握手留影。去年有財政司司長曾俊華去北京獲「習握手」，即時惹來各方揣測，𠵱家林鄭唔覺意搵番張「習握手」舊照，咁多嘢夾埋，難免令人覺得林鄭選特首唔係冇可能。
李八方
mailto:[email protected]