王維基突然宣稱有意競選立法會議員，明報又話佢已經搵咗兩位中大校友做競選顧問，即何安達（新亞英文84）及游淑儀（新亞新聞84），果然來勢兇猛。何安達做過南華早報政治版編輯，資深公關顧問，又係曾蔭權嘅新聞統籌專員，對政治策劃，公關安排，當然經驗豐富到極，游淑儀曾是明報極資深記者，幫過許仕仁，做過曾蔭權競選公關，呢兩位新亞師弟師妹直情可以做有心競選特首嘅人士嘅左右手，依家幫王維基（唔通義助？）爭入立法會，綽有餘裕啦。
王維基係過往電訊界嘅成功商人，做乜要從政參選？一聲話去馬啫，就安排自己上電台自我踢爆婚外情，說明已離婚，以杜絕八卦文章藉婚外情作政治抹黑，顯然係標準公關手法，費事他日俾人逐少引爆，搞到手忙腳亂。本來任何人參選，都應該有政綱有抱負嘅，但當今世界講認知，講情緒多過講事實，講理論以及講理性，特朗普現在逼到希拉莉手忙腳亂，何嘗有甚麼可行政綱啫，講來講去都係空口講白話：（一）bring the jobs back，（二）I can negotiate a better deal，（三）make America great again，純粹講口號，空洞無物，但你唔好理，大部份共和黨選民討厭在朝建制派過往了無建樹，聽一個異人（maverick）講吓口號啫，就已經如痴如醉。當今香港選民聽一啲標準工時，取消對沖，居者有其屋等等聽得太多嘞，知道好難做得到，呢個時候如果有人講得好簡單：「我要換特首，Anyone but CY」，嘩，好有認同感者，投票俾以此為政綱嘅王維基，一啲都唔奇，特別係在教育水平與家庭資產較高嘅港島區，換特首係不少有錢人與中產階級嘅內心希望，對王維基更加有利。但佢嘅得票會係泛民嘅失票，北角區福建幫有理冇理都係工聯會民建聯嘅鐵票，其他人動搖不了，嗌幾句換特首口號，可以為王維基爭到若干立法會選票，但要動搖CY連任之心，恐怕未夠力，除非張德江視察香港之後，聽取好多密報，回京奏准習近平，下秘密命令換人啦。近幾個星期葉劉、曾俊華、林鄭之公關活動頻頻，似係熱身跡象；商界人士亦傳出梁錦松表現出大可取而代之嘅心態。唔，大有可能係王維基在前打衝鋒，為他人創造有利條件呀！