破紀錄！一日流流長可以做好多嘢，但有無諗過有人可以連續24小時齋跑唔訓覺？有14名「香港精神隊」的香港長跑氣袋，噚日早上9時開始，就一直在沙田香港體育學院圍圈跑，在少量時間補給飲食情況下，不眠不休跑到今早9時，最終最好成績的10人在24小時共跑了1875.8公里，即近乎跑了4.44個全馬拉松，打破世界紀錄協會10人24小時共跑約1600公里的原有紀錄，再一次證明香港運動好手係勁揪！
今次挑戰紀錄的「香港精神隊」14名隊員，13男1女，全部都身經百戰，過往已多次成功征服比全馬距離更長的超馬賽事，隊長為曾贏得三屆毅行者香港冠軍、有「毅行者先生」之稱的陳國強(KK)。
14人在體院緩步徑跑，每圈1.162公里，最後平均跑到133個至175個圈。當中跑得最多為從事特殊學校教師的施性概(施Sir)，本身是超馬好手的他，今次跑了175個圈，平均每圈只是用了7分鐘左右，雖然無訓過覺，但跑完後仍然毫無倦容，施Sir說：「我覺得是一個鍛練來的，24個鐘，看自己可以跑到幾多呢。有些人會覺得，咁樣跑好似倉鼠轉圈、好悶，但過程中身邊有很多朋友一同陪跑傾計，所以我好開心一點都唔悶。」而作為14名隊員的唯一女將、任職健身教練的林靜儀，亦跑了133個圈，甚至話因為唔使跑咁快，今次比跑全馬仲無咁辛苦！
至於隊員中年紀最大，今年已年屆六旬的退休人士邱國棠(棠哥)，今次更是他首度24小時跑。棠哥說：「都幾辛苦，尤其半夜跑時，平時個陣已經訓緊覺，所以要不時飲咖啡捱眼訓。不過我覺得人有時點都要嘗試吓一啲挑戰，體驗吓可以點樣辛苦法。」
記者：余瑋
攝影：潘志恆
