恒基喺馬屎埔村嘅收地爭議仲未平息，噚日馬寶寶社區農場同多個團體就踢爆，原來恒基見收地收極都收唔成，諗住私底下透過中間人約見馬寶寶成員同農地租戶區氏一家，話想作出有誠意嘅實質對話喎！不過面對咁多次暴力收地嘅農戶區晞雯聽到都怕怕，擔心恒基試圖收買同分化村民，所以開出一系列會面條件，包括要同恒基主席「四叔」李兆基或者佢個仔對話。
區晞雯仲要求恒基畀市民參與會面同畀傳媒直播會面情況，而恒基要先撤回換地申請同停止逼遷收地等。恒地發言人就證實曾經提出約見租戶協商，希望佢哋可以和平離開，但發言人話噚日已公開表示無協商餘地，咁下一步有乜行動就要再研究吓。