財政司司長曾俊華最近一份財政預算案上周高票通過，不過回想幾年前，財爺都有過「苦日子」。最難捱或者係2011年，佢提出向強積金注資，回水都搞到天怒人怨，最終跪低，向全民派6,000蚊撲火。
不過噚日特首梁振英出席電台節目就舊事重提，喺節目入面講到退休保障，話自己從來都冇話係「全民」，仲話呢個係除數問題，即係話如果有能力照顧自己退休生活嘅人唔拎政府資助，窮人就可以分到多啲資源咁話喎。
講講吓，CY忽然提起自己到𠵱家，都冇拎到財爺當年派嗰6,000蚊喎，咁講法，唔知CY係咪想趁呢個機會暗寸特首選戰潛在對手、其實唔識理財呢？