張德江視察三天，未到習總去年訪問白金漢宮的級數，未算是英國報章形容的「地獄貴賓」。為了提升張總視察的規格，香港實施下列必然措施，大家方便：
一：中環灣仔勢必大塞車，佔中期間唔少學校停課，今次亦特事特辦，中西區灣仔以至南區各中小學兼幼稚園停課三天。家長反對？喂，一日兩度紅雨都停課啦，張總貴人出門勁過紅雨N倍，對不對？
二：灣仔繞道停工四日，工人手停口停，特事特辦，安排工人「被旅遊」，免費任玩深圳福建四天，唔會強迫購物，向港人顯示，大陸已經超越香港，真係好正好靚，無須去日本喪食放題和爆買。
三：機管局民航署承諾，必定替張總和隨行人員courtesy delivery，使命必達，唔使龍蝦！
四：旅業步入寒冬，趁張總視察之便，愛國機構全體休假三天，愛國員工入住本地酒店（除了張總下榻那間）撻張總個朵，三折埋單，附送煙灰袋（唔係骨灰），香港歡迎您。
五：胡主席視察過的公屋變鉛水樓，張總唔信邪，一於去西九睇銀主盤，在ICC派飯俾負資產，爭取人心。民望短短三日，高過狼凸做四年！