過住半退休生活嘅「股壇開心果」藺常念（藺sir）好識享受人生，最近平治換寶馬，買入一架以百萬計嘅寶馬7系房車，而揸咗3年嘅平治E200房車就打算以20萬樓上放售「益朋友」，仲好潮咁擺上facebook賣㖭。佢話「（換車）冇特別原因，只係年紀大想享受吓，唔通留番畀孫用咩？」
68歲嘅藺sir話，揀7系因為去德國旅遊時揸過，感覺好，而且價錢「好抵」，買咗新車但未落地，打算賣走舊車，騰空車位就會即刻接「新歡」返屋企。
但既然花成百萬，點解唔買今期流行嘅Tesla呢？藺sir就話，佢好唔like電動車，皆因行車時太靜，冇揸車感覺，「咁冇癮，送畀我都唔要呀！」
原來藺sir都有個靚車牌「FL 4」，諧音「肥佬四」，約廿年前用約6萬銀買。佢話車牌啱晒佢，因佢在家排第四，名副其實嘅「阿四」。