鬼片影后李心潔自從同老公彭順陀孖B，就留喺馬來西亞安胎，日前佢就喺當地為佢同楊采妮、許茹芸、梁詠琪創立嘅「小黃花慈善教育基金」搞籌款活動，籌到13萬幾港元善款。心潔今年1月宣佈有喜至今，估計至少有6個月身孕，佢嗰日着咗一條黑色裙出席，由於陀孖B關係，個肚已經好大，佢話：「的確比較辛苦，走路都特別困難，說話也會喘氣。」
提到孖B性別，心潔就透露係男仔，但就唔肯透露預產期：「這是秘密哦！其實因為懷的是雙胞胎，所以產期都很難說，我會盡力保持身心安定，好好讓兩兄弟在我肚子裏多待一會。醫生也好緊張，把自己的手提電話號碼隆而重之給我，要我一有甚麼問題就立即聯絡他。」提到佢老公彭順剛拍完戲，會否計劃陪入產房，佢就話：「當然！不然我不生了！他下半年唯一的工作就是陪伴我直到生產啦。」
42歲李樂詩又陀仔
此外，已有兩個囝囝嘅42歲李樂詩就喺Ig公佈有第三胎，已經有咗4個月，佢表示：「呢胎又係仔，雖然恨生女，但一樣開心，最初結婚仲諗住生5個，生咗兩個仔，原來已經好忙。」李樂詩透露B仔預產期同佢生日一樣係10月26號，到時會採取自然分娩。
撰文：馮仁昭
