阿里巴巴主席馬雲近年想做埋影視大亨，入股影視公司，又在港買殼變身阿里影業（1060）。2014年阿里話買呢隻殼，一復牌股價來回地獄又折返人間，搞到唔少散戶損手爛腳。阿里入股咁耐，舊年開始有啲動作，注入網上售票平台「淘寶電影」，同埋電影集資平台「娛樂寶」。
阿里影業噚晚進一步宣佈，淘寶電影完成A輪投資，搵嚟鼎暉投資、螞蟻金服同新浪網入股，仲有影視發行公司包括和和影業、博納影業同華策影視。
呢次集資17億人仔，換12.4%股份，反映淘寶電影估值有137億人仔。網上賣票都有過百億估值，認真厲害。
之不過，呢批A輪投資者好似熟口熟面，姊妹公司螞蟻金服不在話下，阿里已入股新浪微博、博納影業等。其他公司係咪同阿里友好真係唔知，斷估唔會三唔識七啩。