沙田馬場這天第三場蔣嘉琦憑「海嵐一號」為葉楚航贏馬。眾所周知葉楚航當年係見習騎師出身，蔣嘉琦算係佢半個師妹，結果呢對師兄妹攜手贏完再贏，於第七場憑「旅遊首席」再下一城，兩人整日合作兩駒全勝起孖。
第七場三班泥地一哩傷健策騎協會盃，「旅遊首席」之前17戰六P未贏過，呢匹五歲馬這天在港首度跑泥，首配蔣嘉琦減七磅均速前置跑主動，結果末段力拒文廐「歡樂小子」來犯影相險勝一個馬鼻位開齋，4.8倍落飛大熱順利Win出，組合獨贏A2派21.5元，不過賽後卻不見「旅遊首席」馬主兼康泰旅行社創辦人黃士心，要由其他人代領獎盃。
今場政務司司長林鄭月娥是頒獎嘉賓，賽後她亦把握集郵機會，與蔣嘉琦單獨合照。
「旅遊首席」在周三(18日)谷草三班一哩第一組列第一後備評131磅，勝出今仗依例加七磅，變成超越上限，排位前將自動退出。
賽前由雷神試兩次閘都贏的「歡樂小子」，因有直路跳避影子前科，被馬會禁跑夜賽，這天雷神棄騎，復用贏馬配搭黎海榮，影相飲恨做二奶。至於雷神揀騎的「心花怒放」跑落反而只得第三。第四名係半冷門「方程式」，四重彩派二萬一千幾。