上周中去睇韋斯咸告別烏普頓之役，好似參加好友畢業禮咁，學有所成嘞，恭喜晒，準確啲可能係搬遷之喜，嘩！細屋搬大屋你就好啦，亦似結婚party，自細玩大嘅老友踏入人生另一階段，恭喜佢嘅同時又會諗起自己點解仲係儍吓儍吓！長大呢味嘢好奇怪，好少係循序漸進，通常都係非常突然，一件事一個人一剎那，你feel到或者摸到，咦，點解唔同咗嘅？立即變大，得咗。
話說比賽晚上八點開，一早計劃比賽前四個鐘到場，同行嘅偽槌仔fans話使唔使咁早？我都唔想解釋咁多，愛人有約的話，等，本身都係樂趣。到達嘅第一站係去食街坊著名fish and chips，嘩！排咗超過100人響門口，惟有退而幫襯隔籬都有十零個人排隊嗰間，都好味箒，冇要求的人是幸福的。
比賽前倒數三個鐘去shopping，Megastore大特價，不過最愛嘅都係街邊嘅自製tee，唔想着校服咁一式一樣囉。倒數兩個鐘，咬住熱狗響球場附近趁熱鬧，嘩！卜比摩亞像附近有瘋狂球迷聚集中，又唱歌又叫口號，仲有不斷搵可以bully嘅對象，結果一個自high行上車頂嘅球迷，同一個赤膊擔煙嘅肥叔都不幸先後成為指罵對象，走都走唔切。
做乜咁野蠻冇人知，我淨係知冇耐之後曼聯隊巴就出現嘞，由第一罐飛向巴士嘅啤酒帶起，好幾十個冇腦嘅亦跟住起哄飛樽，於是原本好好哋嘅成人禮就變咗質嘞，而一剎那快感嘅代價，可能係被罰成世禁止入場，球迷人生就此玩完，少年，你太年輕了。至於怕死嘅我惟有靜靜雞走人早入場算罷。
最後一戰姍姍來遲，遲足九個字開波，由領先到落後再反勝，比賽係激動嘅；舒寧咸、迪肯尼奧，係爭個泰維斯，告別式係感人嘅，可惜同行偽團友不斷催促之下，未熄燈就要行先一步，唔能夠拆張凳走係有少少遺憾。
睇波學做人，認真拼搏得到嘅快感，係盡情；而唔理代價追求嘅過癮，叫做任性。響三日兩夜間，我成熟咗。
KEYMAN
節目主持