人氣女將蔣嘉琦旺即係旺，這天頭兩場雖都冇馬贏，其中頭場騎大熱門「好友心」更包尾，但跑到第三場四班1400米，佢即重返凱旋門。
第三場蔣嘉琦騎葉楚航馬房，上次由佢自己操刀跑第二的「海嵐一號」，成功以個人撒手鐧放頭跑法，為呢匹七歲老馬沿欄一放到底，獨贏有6.1倍，組合獨贏屬A2選項，並派26.5元。
蔣嘉琦個人累積連勝八次賽事未斷纜，首季在港策騎贏到第24Win，好有機會做本屆冠軍見習騎師。此駒同時見證嘉琦與葉楚航破天荒首度聯手贏馬；而「海嵐一號」乃自2013年10月建功後，相隔兩年多共31個月，終於重開勝門，馬主拉頭馬時顯得特別開心。
今場三重彩係熱門天下，事關二、三名分別係「勝利之星」及大熱門「太皇鷹」，前駒由楊明綸操刀，令呢場賽事開出這天首條華將Q；第四名由大冷門「動畫大師」拎到，四重彩派11萬幾。