這天年輕三歲馬成績唔錯，第四場開三歲馬Ｑ「歷險家」搭「嫡愛寶」後，第五場亦是由三歲馬「風火勁駒」勝出。
第五場三班1200米草地，練馬師告東尼旗下三歲澳洲自購馬「風火勁駒」，上次由雷神接手於谷草1200米2.6倍大熱開齋，這天換何澤堯轉戰沙田，好像完全冇人信，為17倍冷門，而雷神揀騎的「魔連奴」則為3倍次熱門。
結果兩位馬主衛淑莊與張國榮（與已故歌手張國榮同名同姓）合夥的「風火勁駒」成功複製賽果，直路抄出中外叠發力一攻而破，並鬥贏末段貼欄慳位追上的「魔連奴」，以短距離之先取得連捷，整個贏馬過程同上次如出一轍，組合獨贏A3派49元。
反為「魔連奴」輸開繼續輸，連續四場有飛或係大熱，統統未勝，維持季內兩捷身份，今仗雷神亦有揀錯馬之嫌。
何澤堯早前接手由潘頓贏開谷草的「勢必跑」，順利為該匹方廐馬連捷，呢鋪則向東廐「風火勁駒」照辦煮碗，對幕後可謂交足功課。
今場三、四名由一對冷馬「威力川」及「榮光大道」瓜分，前駒初出由韋達上名，後駒則贏完跑第四，四重彩派七萬三千幾。