上次講過胡孟青（城大畢業，李斯特大學碩士）話與一班校友滿懷高興，想訂機票返李斯特城參加英超冠軍遊行，但恐怕趕唔切咯。前幾日青姐碰到左丁山，講冠軍巡遊可能會在英超第38周賽事完畢之後就立即舉行，即係呢一兩日之間，打鐵趁熱吖嗎。時間緊迫，趕唔到參加巡遊都冇辦法。總之大家一齊高興，為李斯特城歷史上第一次奪得英超冠軍而歡呼。
老友記賓架W係中大聯合書院歷史系校友，李斯特大學經濟史博士，回港後在銀行界赫赫有名，但從來唔叫自己做Dr. W，佢平時鍾意唱歌、高爾夫球，多過睇足球，但李斯特城的故事轟動體育界，連佢都興奮不已，講番既然錯過咗一賠5000嘅投注，不如吼住下季歐聯嘅李斯特城賠率是否有一賠100，若然，就下注一百鎊，等自己過吓心癮。攞歐聯冠軍，大想頭一啲啩，冇五百倍賠率左丁山都唔肯下注呀！
政論專家新亞師弟蔡子強係足球迷，長篇大論講李斯特城之Underdog上位之道（明報5月12日），左丁山大致同意，但佢引述之故事講及籃球戰術「全場緊迫人盯人」（full -court press）防守法，左丁山認為有啲嘢要補充。
左丁山小時候有一隊小學小型球足球隊，周圍挑戰與被挑戰，讀中學就碰上著名大教練尤應邦先生，苦練成為籃球校隊大後備，長坐後備櫈，已覺得好光榮。籃球戰術打全場緊迫人盯人防守，需要極大體力氣力，打到下半場後段（當今籃球第四節），往往無以為繼，任由對方魚肉，即使有充份氣力體能，仍然未必能夠以弱勝強，通常係要對方控球球員嘅傳球水平比較差先至有效。蔡子強所述之例子，在美國發生，美國籃球有不同級別水平，有中學、大學、業餘聯賽又有Development League（相等於預備組），水準參差，全場緊迫人盯人或可應用，但在頂級NBA，就完全唔得，弱隊想打贏波，打「爛仔波」，用全場緊迫人盯人戰術，只會輸到面懵懵。NBA之控球後衛（point guard）多是頂尖高手，例如雷霆隊嘅Westbrook，在後場被緊纏呀，一個長傳俾杜蘭特來個fast break（快攻）取分易如拾芥，故此NBA極少見到用全場緊迫人盯人戰術，亦非常難以爆冷以弱勝強。不按規矩打爛仔波並非次次都係Underdog取勝之方。