【本報訊】小西灣一間逾20年歷史的舊文具店於今年7月底結業，原因是領展要收舖進行大裝修，惟文具店東主對裝修後重開感到不樂觀，已做好結業準備。文具店職員表示不捨得，「啲客叫你唔好走，但有乜能力」。有當區居民則感嘆，「以後買嘢要去藍灣」，又斥扼殺小店「兇手係領展」。
街坊斥「兇手係領展」
「家在小西灣」facebook專頁昨日發帖，指小西灣廣場「樂趣文具精品店」因商場大裝修，領展早於大半年前要求交舖，文具店計劃今年7月底結業。職員王先生接受《蘋果》訪問時說：「文具店開咗20幾年，係小西灣區都搬咗幾次，梗有唔捨得」，又指「佢（領展）跟足程序做嘢，提早半年通知，冇計啦，走咪走囉」。
該職員稱，領展會有重新編配舖位計劃，惟至今沒有細節，未知加租幾多，即使有舖位也要計數有沒有能力重開。他表示，在文具店工作數年，與附近街坊熟絡，「啲客叫你唔好走，但有乜能力？」他指現時屋邨文具店買少見少，「損失嘅可能係街坊，日後啲舖貴租，搵番同一樣嘢都會貴咗」。
有居民在fb專頁留言，斥「兇手係領展」，慨嘆如樂趣執笠屋企樓下再沒有文具店，要買文具最近須去藍灣廣場，「咁鬼遠！」有街坊指，由小西灣廣場行去藍灣廣場，至少需8分鐘。領展發言人回覆指，領展已經與商戶展開洽談，並會繼續與商戶保持溝通。
■記者張文鈴