行開旺角先達都知道，香港零售市道差，搞到場內有近三、四成舖頭已經關門大吉！
不過最近呢股「關門」風潮，可能有機會席捲深水埗黃金與高登！話說腦場好多sales大嘆生意差，由今年農曆年假後開始，生意額一直下滑了近四、五成，據知好多舖頭為度過這段艱難時刻，就連佣金分紅制度都大大向下調整了，不過情況仍不見好轉。
據知重災區是一樓的高登，平均每間舖的生意跌幅是最高的，地下及地庫的黃金，生意額相對要好上一點點。跟據香港零售業的傳統生意周期，有所謂：五（月）窮、六（月）絕、七（月）翻身之說，預計腦場的生意額，最快要到七月才見有好轉機會。
另外，有sales向記者放料，這種生意不景氣問題，有可能牽涉到代理方面，「其實除咗我哋『坐貨』（賣唔出），其實代理方面都面對同樣窘境，貨倉存貨量高、新貨又不太敢放出市面，這個連鎖性問題，就有如玩層層叠遊戲一樣，一層又一層地堆叠起來。不過好消息可能是用家方面，舖頭間固然會出現減價戰，希望刺激消費。另外大家更要留意八月份、最近身的一次電腦展，預計好多電子產品代理，為了降低倉存的壓力，或許會做出割喉式減價，而且貨品種類會非常多樣性，事關『坐貨』的商品，都相當全面嘛！」
記者、攝影：朱崇德