ViuTV真人騷《G-1格鬥會》最終王者將於明日誕生，成功晉身最後兩強的郭思琳和唐紫睿（Hazel）是非不絕，但她們的鍛煉過程相當艱苦！向來弱質纖纖的思琳挑戰體能極限，找來世界級柔術高手Mike Powers和香港健美先生Cola Chan（陳浩然）分別教授柔術和重力訓練，特訓期間傷過喊過仍不放棄，更成功拜師Mike門下。
撰文：嵐山
以下動作均經專人訓練，切勿模仿！
多次獲得全美巴西柔術（BJJ）冠軍及泛美巴西柔術冠軍的Mike Powers，曾在電影《激戰》教張家輝和彭于晏柔術格鬥技，他多年來收逾百學生，但收女徒弟還是首次。日前Mike與郭思琳在旺角一間健身中心進行柔術訓練，Mike完全冇憐香惜玉，一埋牙便使出「斷頭台」——將思琳的頭夾在腋下，動作相當危險，切勿模仿！
之後Mike再教思琳後頸鎖、腕挫十字固、木村鎖和雙腿抱腿摔，每個動作都需要極大體力，配合格鬥技使對手動彈不得，思琳說：「剛開始練習，Mike已經一拳打埋嚟，但我仍當佢係天使，因為佢比起其他教練算冇咁嚴，仲做心理輔導。知道佢願意收我為徒，覺得非常榮幸。」
「唔當我係女仔」
身高1.73米的思琳，天生模特兒骨架，從未想過在擂台上與人打MMA（綜合格鬥），由於她體力不足，所以比賽前一個月要跟Cola進行重力訓練，加強速度及肌肉爆炸力，思琳說：「比賽前每日起碼做4個鐘運動，包括BJJ、泰拳同重力訓練，最辛苦係瞓喺地，單手拎啞鈴再起身，腹部要食住度力上。」她更承認喊過無數次：「Cola真係地獄教練，佢完全唔當我係女仔，以前嘅我做事好容易放棄，但今次之後變得更堅強，眼淚係唔值錢。」
憶傷患眼濕濕
不過，思琳在比賽期間手腕和尾龍骨等多處地方受傷，她眼濕濕說：「真係冇諗過咁激烈同會受重傷，我唔係專業拳手，唔識lock實拳頭就出拳，踢人時腳趾公關節又屈到，𠵱家着高踭鞋都痛。因帶傷去比賽，左邊胸骨出現撕裂，仲有尾龍骨等都受過傷。」不過，坎坷過後有艇搭，思琳表示從中亦有裨益：「比賽期間我戒咗煙、酒同安眠藥，成個生活改變咗。」
