隔牆有耳：
北角碼頭巴士總站告別街坊 - 李八方

做人同搭車都一樣，習以為常嘅事，其實一切在變。八方忽然感慨，因為有58年歷史嘅北角碼頭巴士總站終完成使命，告別維港。噚日係總站last day，唔少老街坊到碼頭緬懷。由細到大都搭23號巴士返學嘅陳太好不捨︰「我好鍾意呢個巴士站，地上有巴士壓過嘅碎石、油漬，見證巴士站歷史，新站就會冇咗。」

唔少巴士迷到場拍照留念。12歲梁小朋友經常喺總站搭巴士，佢話香港露天巴士站已經唔多，具證歷史嘅更越來越少，「都想睇番未出世時候巴士站嘅面貌」。新巴站長陸先生噚晚見證最後一班巴士開出，萬般不捨，「我哋個員工休息室好特別，係圓形，全港得番兩個。」
新巴城巴12條路線會喺今日凌晨頭班車起，遷移至隔鄰琴行街與電照街之間北角碼頭公共交通運輸交滙處內，繼續服務乘客。