今期(14日)第九場二班1400米獅威啤酒挑戰盃，雷神莫雷拉放棄由佢贏三場嘅「迫擊炮」，選騎仍未出頭嘅「壯思飛」，雷神話其實兩匹馬今場機會不相伯仲，但講前景「壯思飛」將來成就會高啲。
不過「迫擊炮」今次就有位特別粉絲入場打氣，引入此駒嘅女馬販Jen Campin專誠由新西蘭飛到香港，喺練馬師姚本輝陪同下入馬房探「迫擊炮」，足足逗留咗半個鐘。本港唔少高班馬都係阿Jen嘅揀手貨，包括「喜益善」、「歡樂盈盈」及今屆跑馬地百萬挑戰盃盟主「金滙龍華」等，都係隸屬沈集成，「迫擊炮」係阿Jen同輝哥第一次合作，難怪佢高度重視。
Jen探完「迫擊炮」後大讚匹馬身型好紮實，而且雙目有神，隻馬今次初上二班兼且增程角逐1400米，難度唔細，不過阿Jen話「迫擊炮」母線家族出過在港兩勝一班2000米嘅「喜蓮精神」，「迫擊炮」下季甚至有力扳上一哩。
「迫擊炮」喺新西蘭曾心律不正常，依然運嚟香港，阿Jen話馬主當時幾擔心，但做檢查當日「迫擊炮」情緒有啲緊張，可能因為咁搞到心跳加快，情況並不嚴重。來港後健康好正常，跑過九場都入前五名有獎金收，鬥心好強，今次賽日阿Jen仲會入場打氣，有信心「迫擊炮」喺田泰安胯下取得季內第四場頭馬喎！