【本報訊】記者分別於4月24及30日到訪位於石硤尾的賽馬會創意藝術中心（JCCAC），4月24日仍見到2樓G.O.D.展覽館內堆滿鐵架，問過附近租戶表示情況已維持一段時間，展覽館亦很久沒有對外開放。
然後記者於4月30日星期六再到2樓G.O.D.展覽館外，當時樓下正舉辦一個關於劏房的展覽，因此中心內亦有不少遊客，單從門口望入去，今次就清理好堆鐵架，不過展覽館仍然重門深鎖，門口位置貼了告示板指，如有意參觀，可以聯絡市場部預約時間。
不少到場參觀的市民均表示失望，馬先生表示，「已經好耐無嚟過（JCCAC），但每一次嚟都未見過佢開門。（有冇諗過用預約）冇，亦都唔知點用。」他認為既然開在JCCAC，為何不能打開門讓大家進去參觀，又要預約呢。
另一位陳太就覺得JCCAC幾特別，都有藝術氣息。平時有留意G.O.D.這個品牌，不過展覽館要預約就未必入去，因為好遠過來。
羅先生一家大細來到JCCAC家庭樂，專程來到2樓都是為了睇G.O.D.的展覽館，被問到見到要預約才可參觀會否失望，羅先生表示「唔知喎，原來要by appointment……（會唔會試下約？）睇下今日預約到，睇到就睇囉，預約唔到就即走㗎喇。」他表示參觀不到有少少失望，但都無辦法。
因JCCAC地方不就腳，主要是周末才有人流參觀，而G.O.D.場內職員周末不上班，所以想找個負責人都冇，而到訪者亦不知道有預約安排，個個都摸門釘失望而回。
G.O.D.：無人流才改為預約
G.O.D.創辦人楊志超表示，起初生活館有開放，後來因為無人流所以改為預約形式。他指出，呢度無資助，合約亦無指明要開放，「之前試過開放，啲人就覺得係應份…呢度唔係賣嘢，係比人睇，無收入亦都無資助，純粹義務性質。」
記者試過入內參觀，如果說是一個展覽，倒不如說是一個私人收藏，地方較為凌亂，堆滿不少具香港回憶的收藏品，滿牆壁的掛鐘、各式各樣的舊木椅，甚具玩味。楊志超表示，可以考慮在一些有活動的日子，例如有手作市集的時候，再開放予公眾參觀。
記者：張紫茵