食齋去旅行，諗起都覺煩。生命中試過有七個月時間茹素，出差時總是要事先留意當地有冇素食可食，去泰國還好，佛教國家不乏素食人士，一般餐廳都起碼有個Phai Thai with Vegetable可以選擇；紐西蘭也ok，餐廳總有一兩個附有綠色樹葉標記的veggie dish；韓國就真係無啖好食，連泡菜都因為有蝦醬而唔食得，so sad。以下5個最適合素食者旅行的國家，有些是因自身宗教、文化背景所以食素無難度；有些則在素食主義抬頭的年代，只提供素食的餐廳越開越多。
1) 印度
唔計衛生，對素食者而言印度應該是食嘢最「安全」的地方，因為宗教和傳統文化印度有不少素食者，而且印度對所謂「齋」有相當嚴格的定義，因而印度一直是世上人均消耗肉食最少的國家，當平均每個美國人每年食198.5磅肉食時，印度人只係食咗7.2磅。
2) 泰國
泰國這個佛國本身已有不少茹素的佛教徒，素食選擇自然不少，而且泰國蔬菜種類豐富，料理亦多使用椰奶而非牛奶，對嚴格素食主義者(Vegan)來說更是喜訊，湯或咖喱一樣食得。
3) 以色列
嚴格素食主義者近年在以色列突然冒起，據2014年數字，在當地8百萬人口之中就有20萬vegans，傳統素菜美食已有鷹咀豆泥、炸豆丸，新派素食餐廳更一間接一間，在第二大城市特拉維夫更是遍地開花，在專為素食人士而開設的著名飲食網站Happy Cow更可找到全國都有不少素食選擇。
4) 德國
講起德國自然諗起腸，係的，德國人本來是個「食肉強國」，燉肉或豬手，兼且一街都係又粗又長的司華力腸，（啤）酒池肉林，先食到德國人咁高大。但近年風氣轉變，素食抬頭，首都柏林更被美國雜誌喻為全球最佳素食城市，餐廳之外市內還有不少售賣素食品的雜貨店。
5) 新加坡
新加坡跟香港一樣，是個飲食文化多元的城市，也是多種宗教匯聚的地方，華人信佛，馬來人信伊斯蘭教，印度人則信印度教，各教都有茹食的習慣，於是素食餐廳也不少，根據Happy Cow統計，小小的新加坡就有多達459間素食餐廳推介。
記者：曾冠輝、容逸富
