有藝術單位將噚日（五月十三日）定為「國際請病假日」，畀個藉口各位打工仔唞一唞，即刻轉身「射」個三分「波」！有打工仔大讚呢個節日好有意義，一定會參與咁話，其實做得打工仔，平時都袋住幾個藉口射吓波啦！你又有冇射波藉口「些牙」吓？
根據粗略而簡單但有片有真相（即係街訪隨機抽樣）嘅調查發現，聲稱頭暈身㷫、起唔到身、困(車立)、撞車、地鐵塞車、屋企人入咗院，甚至搬埋阿爺、阿嫲嘅白事出嚟都夠膽死成為射波藉口。
而最尷尬嘅係，射咗波又畀老闆、同事撞到正！有人話見到請咗病假嘅同事秘撈，又見到請咗病假嘅老師走去食老麥，或者有人請假去睇戲、去蒲、甚至去旅行，撞到同事事小，話晒大家槍口一致，撞到老細先大件事，被照肺、被出warning、被消失是常識吧。
不過打工仔最有冒險精神，波點可以唔射？而發起「5.13國際請病假日」嘅藝術單位就建議，呢日最好去寫生、釣魚等，可以陶冶性情。不過有受訪者就認為此舉好虛偽，如同特首叫大家食lunch嗰陣去游水無分別，都係留喺屋企瞓吓覺仲實際啦！