噚晚係一年一度記協周年晚宴，用星光熠熠嚟形容唔夠呀！除咗有港大校長馬斐森做主禮嘉賓，仲有兩位新聞男神，港台嘅蘇敬恆同埋喺《導火新聞線》入面飾演記者嘅王宗堯，相信唔少女行家都睇到心心眼，不過男行家亦毋需妒忌，因為周家怡同楊淇都有現身。再加上喺「安裕效應」下，今年晚宴有520人出席，係歷年之冠！
唔講港獨同楊丹
晚宴以「真．黑白」做主題，記協主席岑倚蘭致辭時解釋，當下嘅假實在太多，「顛倒黑白、黑白混淆、說黑道白」，「是其是、非其非變成是不是、非不非」，而做記者嘅就要設法搵真相，捍衞大眾權益。
馬斐森上台致辭不忘自嘲，因近排港大風波多，佢話要向記者講句唔好意思，因為佢唔會講港獨、陳文敏、特首做校監同埋研究失德等題目，可能令傳媒唔知點起題！
佢又提到佔領期間落金鐘探學生得到唔少歡呼，但到今年佢譴責衝擊校委會就俾人鬧爆。佢澄清佢冇變過，一直認為安全係最重要考慮，而且衝擊當日唔在場嘅人，冇資格話佢知個感覺同埋應該點反應。但話說回來，佢亦覺得香港嘅青年好有禮貌、聰明同勤力，絕對唔係有啲人話嘅激進、野蠻。