長江基建（1038）主席李澤鉅除咗說話寸寸哋，近年亦有一個特別嘅地方，就係佢每次主持業績會或記者會，都會不停眨眼，近一兩年仲好似特別嚴重，直情可以話係喪眨。噚日佢喺股東會上就解釋，只係攰啫。
李澤鉅籲畀多啲bonus
長建噚日下午舉行股東會，全程大約40分鐘，李澤鉅坐喺台上望住一大班小股東時，就不停眨眼，除低眼鏡讀章程時反而好少少。有好奇兼關心佢嘅小股東忍唔住直接問佢，雙眼係咪唔舒服，佢冇露出不悅之色，笑住話係「攰囉」，仲講笑咁話，叫大家應該畀佢放假，畀多啲bonus佢喎。
根據眼科學會會長梁裕龍醫生所講，一個人不停眨眼，好大機會係因為眼皮毛囊發炎，毛囊油脂分泌過多就會發炎，繼而導致眼皮肌肉敏感，於是不停眨眼。另一個原因，可能係淚水分泌不平衡。一個人工作得攰，甚至去到失眠，亦會引致淚水分泌不平衡或者眼皮毛囊發炎。
不停眨眼又可能只係一種心理狀態。梁裕龍醫生指出，有啲人喺某種環境或者說話時，可能會不自覺眨眼。講到底，定期驗眼都冇壞嘅。李澤鉅今年先至51歲，仲係長和系接班人，身體健康好重要㗎。
佢叫大家畀佢放假，查實佢係太子爺，鍾意幾時放假都得喇。不過，可惜吖，長建與電能（006）過去幾年經常拍住投資海外大型項目，電能噚日話等咗兩年，終於為手頭680億元現金，搵到好正嘅投資機會，李澤鉅應該繼續唔得閒。
李華華
mailto:[email protected]
