民記一眾立法會議員連日化身投票機器，喺會議廳為政府護航，不過噚日中午立法會完成表決放飯，佢哋就即時化身「飯民」，圍埋開飯慶祝。民記新任黨團召集人陳克勤，噚日喺facebook上載圖片（圖），話佢哋用13.5小時否決泛民全部修正案後，黨內多名議員即提供不同餸菜「開餐」，其中梁志祥提供白飯，「高佬」何俊賢提供鹹魚，陳鑑林提供潮州鹹菜，陳克勤就提供大量罐頭，包括豆豉鯪魚、回鍋肉、五香肉丁同沙甸魚，結果被何俊賢笑佢太行貨。至於出名識食的「象哥」黃定光，就只提供一個「空肚」喎。