唔少家族企業嘅大股東鍾意高調，英資太古A（019）嘅大股東施懷雅家族就選擇低調。
其實施懷雅家族有兩位太子爺，分別係42歲嘅Merlin Swire（施銘倫），同佢35歲嘅細佬Sam Swire（施維新）已經喺集團工作多年，亦先後擔任太古非執董。
Merlin係英國太古集團行政總裁兼董事，Sam亦係董事。佢哋保持一貫低調作風，只係等到股東會先至現身，噚日仲要坐埋一邊，會後笑笑口傾偈，兩兄弟感情應該不俗。
適逢太古集團今年成立200周年，當然要問兩位有乜慶祝活動喇，點知可能因為怕醜，兩兄弟都冇答問題，開完會就急急腳走。聽講由於今年亦係集團喺中國成立150年，稍後會喺內地有周年活動。