工聯會「MC興」王國興前日同社民連長毛喺立法會開拖後，噚日又喺立法會向長毛隔空開火，可惜王國興呢次鬧人唔睇時間，結果俾立法會主席曾鈺成喝停，叫佢唔應該喺全部議員修正案表決完成後，仍進行相關辯論。
王國興之後仲未收口，其後發言又鬧過，不過今次就瀨嘢出醜！話說佢又鬧泛民提出修訂拉布，影響政府工程，唔少工人面臨斷「砍」，呢個時候中文出名好的曾主席隨即出招︰「我相信王國興所講嘅斷砍，係指斷『炊』，呢個等我哋記錄人士更正。」而長毛即時食住上，恥笑王國興「火、石不分」，話王國興如有需要，佢可以借個粵語讀音軟件畀佢進修吓喎。