李斯特城爆大冷奪英超，實在有太多啟示。其一，就係土豪大孖沙同平民嘅距離，未必如想像咁大。大球會買球星時財大氣粗，但喺發掘新星方面，優勢已與中小型球會收窄。
李城嘅出爐英格蘭球員先生馬列斯，係球探兩年半前喺法國乙組發現，轉會費40萬鎊，平到笑，等於曼聯朗尼10日嘅人工。
細球會執到寶，要多謝大數據年代，十幾年前美國有棒球隊用大數據用到出晒名，詳情可見《Money Ball》小說或電影。
要掌握數據，唔使自己慢慢砌資料庫，可以外求，例如Prozone，不少足球隊都有用其數據。甚至有球會參考足球經理遊戲《Football Manager》的龐大球員資料庫，作初步揀卒。細球會花少少錢就有大堆數據，識得用嘅話，隨時搵到滄海遺珠。
股市都一樣，以前冇互聯網，基金經理較散戶有絕對優勢，神級「芬佬」彼得．林治管理嘅麥哲倫基金，至可以喺1977至1990年間取得年均複合29%嘅驚人回報，累計回報係標普500指數嘅4倍。現時資訊唾手可得，散戶要鑽研個股，除咗冇得見管理層，未必輸蝕畀基金經理。
基金優勢漸失，年年跑贏大市嘅已絕迹，散戶如果唔想自己揀股，不如聽「股神」畢菲特教路，買指數基金好過啦。
笑笑生
mailto:[email protected]
本欄逢周五刊出