以前好多人話，節儉係中國人嘅美德，尤其老一輩會對自己嘅節儉引以為傲。小弟做記者，以前會搵小股東做吓街訪頭仔，有時會遇上其貌不揚嘅伯伯、婆婆。佢哋本來打一份基層工作，揸幾十年巴士，做幾十年清潔女工，死慳死抵一儲到錢就買樓，儲吓儲吓就有幾層樓，然後拎住退休金嚟炒股，長輸長有。佢哋好慘？No！退休金對佢哋嚟講係散紙，有龐大租金收入backup佢哋生活，退休金純用嚟輸，呢類超孤寒又有實力嘅隱形富豪同富婆，可能係香港獨有產物。
節儉可以係美德，同時可以係死穴，分別在於節自己個儉，還是節人哋個儉。節人哋個儉，就係大忌。投資股票，道理亦一樣，睇間公司個老細闊唔闊綽。如果個老細日日落街食三餸飯，佢炒股票一定唔益人，幫佢打工唔慌有人工加，買佢嘅股票、做佢員工，命運註定坎坷。
中國金融市場嘅死穴，就係鍾意節人哋個儉，尤其係對於外國勢力。小弟每日都抽時間睇各個股份板塊升跌強弱，可以大膽講句，好股票佔唔到總和嘅10%，甚至5%，原因係好嘅中國公司一定收埋唔上市，你幾時會見到華為諗住上市？當你只見到聯想（992）、中興（763）時，真係想講粗口。下下咖喱味嘅屎，或者屎味咖喱，太少好選擇，成個股市，最後咪冇人幫襯囉。
晉佳
http://www.facebook.com/advanceguy1