意馬國際（585）大股東單九良舊年開始失聯，公司終於換人做董事。噚日意馬國際宣佈，由於單九良連續6個月缺席董事會會議，決定撤銷其執行董事職務，即日生效。
不過公司搵嚟代替單九良個位嘅蔡家頴女士，更加令人摸不着頭腦。事關33歲嘅蔡女士將會負責公司證券買賣業務分部，但佢喺香港完成高中後，過澳洲柏斯Perth Institute of Business and Technology進修。之後佢返香港喺一間五星級酒店嘅餐飲部，提供客戶服務，超過一年，公司形容佢有餐飲及娛樂業務經驗。
睇嚟睇去，蔡女士當年以24歲之齡，由2006至2014年擔任合一投資（913）執董，算係最與證券買賣業務有關係嘅專長。蔡女士與意馬簽約2年，月薪4.5萬元。