早前四川成都有位九十後當「衣櫃整理師」，憑一手執衣櫃技巧月入近萬元人仔，仲打算開公司，真係有諗頭。靠人執衣櫃可以幫得你幾多次？不如疊埋心水，趁近排天氣真係轉熱，自己動手整理！記住以下四招，等你執得容易啲。
1.分門別類：唔係講廢話，而係分類真係好重要。除咗老老土土跟季節、衣物種類分類，其實最有效率係分平日返工着定周末着，一般辦公室巴絲打不妨分出一欄畀要燙嘅上班outfit，周末休閒繽紛衣着另外擺，既減少朝早起身襯衫煩惱，又可將經常郁動到嘅衣櫃範圍縮細，日後打理更方便。
2.善用行李篋：唔少香港人鍾意去旅行，屋企有幾個行李篋少不免。換季時不妨將冬天厚重衣物摺好同處理好後，連同抽濕劑放入行李篋，慳位又可以保持衣物質地。
3.自加間格：唔只衣物要間格分類，clutch同手袋等小物都一樣要整齊。要放置可摺又薄身嘅手袋，可以將佢哋按個人喜好放入平時用於晾乾碗碟嘅間格，咁就一目了然，要用時亦可以方便提取；至於瑣碎小物如恤衫後備鈕扣，不妨喺衣櫃兩側加設磁石，用鐵罐收納小物後貼上磁石，容易搵到。
4.捲多過摺：由細到大都係學摺衫，但次次想着嗰件擺咗喺底，一拎就會摷亂晒。對付薄身或唔洗燙嘅衣物，可考慮用捲衫代替摺疊，一來方便睇到衣物圖案，拎出來着時亦唔會整亂隔籬。
記者：黃樂雯
