經濟唔好，和電香港（215）行政總裁黃景輝噚日示範何謂慳得就慳，竟然俾佢諗到用「人肉Power Point（簡報）」向傳媒做presentation，佢老闆超人李嘉誠真係要畀個like佢！
話說政府有意收番大部2G同3G頻譜再拍賣，作為本地電訊商之一嘅和電即刻高調反對。黃景輝喺酒店舉行股東會後，搵來酒店職員充當「人肉Power Point」做講解。
黃景輝一邊講，旁邊職員就自動波，一路換牌，搞到成件事十分原始，場面有趣，十足十華華讀中學時做presentation咁，真係好耐未見過，牌上嘅圖案文字亦幾似學生習作。佢認為，一旦重拍就會令到成本大增，大家應該支持自動續牌嘅方案一，此舉最符合香港與業界利益，皆大歡喜咁話。