曼聯喺周二輸波前四位置危危乎，睇怕領隊雲高爾都幾難喺下季繼續留低。曼聯嘅傳奇主帥費格遜（左），就俾人影到佢喺周二約咗熱刺領隊普捷天奴（中）一齊食晏，唔通費Sir諗住游說普帥過檔曼聯？另一邊廂傳咗半年話會加盟曼聯都未落實到嘅摩連奴，周二就飛咗去墨西哥，將會出席一個國際足協會議；而印尼體育部長突然公開話想邀請摩帥做印尼國家隊主帥，年薪1,300萬鎊都唔成問題喎，之不過印尼目前仲係俾國際足協制裁停賽緊，唔通請摩佬嚟帶表演賽？