現年36歲的商台DJ朱薰再為人母，前日剖腹誕下6.1磅B女，BB面圓圓嘴嘟嘟好可愛！朱薰昨在電話說：「過程唔算辛苦，反而上次生哥哥，本來想順產，因為BB冇掉頭又見紅要即刻開刀，今次等嘅時間好心急。」問老公譚健榮有否剪臍帶？她說：「上次緊急開刀冇得陪產，今次終於有份剪臍帶，佢形容好似剪牛雜咁。」
朱薰表示囡囡取名在之，意思是「我喺度」，她說：「BB出世時似我媽咪，但𠵱家就似哥哥，哥哥都好開心，初頭姑娘畀佢抱，佢有少少緊張，但抱咗又OK，雖然只得3歲，好似突然之間成熟咗。」朱薰跟老公有一仔一女湊成「好」字，笑言會封肚：「應該夠皮，湊一個已經好攰，𠵱家湊多個應該收檔。」
採訪：皓騫