呢三年，曼城領隊比歷連尼究竟功大於過，定過大於功呢？牽牛兄認為比帥都唔係咁差，但小弟就認為比帥令人失望。比歷連尼呢三年嚟都係食緊文仙尼留落嚟嘅老本，雖然今季入到歐聯四強，但成隊波嘅打法都冇進步過。
由前到後，阿古路、大衛施華、耶耶托尼同埋高柏尼，呢條係文仙尼為曼城樹立起嚟嘅脊骨，去到比歷連尼年代，仍然靠晒呢四位老臣子。佢哋四個勁，比帥繼續靠佢哋係冇錯，但牡丹雖好都要綠葉扶持。不過，比帥買番嚟啲綠葉真係冇眼睇；阿古路多傷，每季踢得一半多啲，比歷連尼應該買個同佢輪換到嘅人返嚟，但由最初簽番嚟嘅尼格度，到家陣嘅韋菲特邦尼，真係冇一個可以幫輕吓阿古路。後防方面，比帥好鍾意用佢位愛將迪米捷利斯，但迪米佬呢三年瀨過幾多次嘢？真係多到數唔晒。
不過，講食老本，曼城下季嘅新帥哥迪奧拿都唔好得去邊。三年前，當哥迪奧拿去到拜仁，大家講到佢要提升拜仁做新宇宙隊，但喺呢三年，拜仁嘅實力冇乜點提高到，感覺似係一個練開降龍十八掌嘅走去練太極，只係改變咗風格；當哥迪奧拿嗰套玩唔掂，拜仁都係靠洛賓喺邊路屈機。雖然拜仁依然稱霸德甲，但連續三屆歐聯四強都輸畀西甲隊，都令人有啲失望。
曼城啲老本俾比歷連尼食得七七八八，今夏哥迪奧拿點都要自己砌過隊波。雖然陰謀論講到比歷連尼聯賽擺爛，想搞到哥迪奧拿冇歐聯踢，但各位哥迷同曼城迷可以放心，就算信唔過比歷連尼，都可以信吓雲高爾喺關鍵時刻自爆嘅能力。
文：咖喱