林鄭率團上四川 （圖），總結特區政府支持2008年四川汶川大地震後重建工作。今次特區政府代表團除咗官員外，仲邀請參與援建嘅各界義工，咁都好合理，不過原來代表團仲包括15名本港各大傳媒高層，包括無綫新聞部總監袁志偉、有線電視新聞執行董事趙應春、《南華早報》總編輯譚衛兒等人，難怪有政圈中人猜測，林鄭此行似為爭取明年「更上一層樓」，想同傳媒高層打好關係喎。
不過又咁講，重建項目由公帑支付，有傳媒代表隨團，睇睇公帑是否運用得宜係好事，不過政府唔知點解冇請《蘋果日報》隨團，《蘋果》讀者都好關心公帑點用，冇理由選擇性唔邀請《蘋果》，《蘋果》覺得有冇新聞價值派唔派人去又一件事。八方問過政府，得到回覆係傳媒機構代表自費赴川，至於點解唔邀請《蘋果》呢，就冇回應，八方試過追問，不過得到嘅回應係「冇補充」。