中國人興「登六」、70或80足歲賀大壽，不過鬼佬就鍾意搞新意思，西方傳統，如果喺生日當天或當年，做啲同自己歲數相關嘅紀念性創舉，就叫「香檳生日」。
馬拉松達人——恒生銀行（011）大公關張樹槐（水哥），啱啱呢個星期日就喺孕育中國文化第二大河——黃河三角洲東營市，以完成人生第58個馬拉松，去慶祝今年58歲，跑完步要歎杯香檳應景慶祝。
詩仙李白名句「黃河之水天上來」，水哥完成賽事，亦專登去黃河流入渤海嘅出口，唔知係咪時節關係，當日未見奔流氣勢，但啲海水都係黃色，足證黃河確係炎黃子孫嘅搖籃。此次賽事，水哥亦遇奇人，一位來自江蘇年約54歲嘅男士，背負40斤鐵跑畢全馬。馬拉松精神志在贏自己，佢話抵達終點，都忍唔住向呢位名副其實嘅江蘇鐵人握手致敬。