李斯特城懷住輕鬆心情迎接周日英超煞科戰，周二球會喺主場皇權球場舉行頒獎典禮，應屆英格蘭球員先生馬列斯（圖），獲得由球迷投票選出嘅今季最佳球員獎項；而中場尼高路簡迪就當選由球員自己選出嘅最佳球員。另外，李城為下季擴軍就先食檸檬，雷恩前鋒小將奧士文尼迪比利自爆拒絕咗李城。而領隊雲尼亞里就順利獲選為英超四月份最佳領隊，最佳球員就由曼城阿古路奪得。