近年人氣旺兼得民心嘅財經名人，肯定包括「魔童」王維基與一田前行政總裁莊偉忠。魔童話考慮參與9月立法會選舉，花生友估計勝算甚高；至於莊偉忠，佢矢言無意從政，但接咗廣告，星展銀行噚日就喺facebook上載莊偉忠拍嘅一條廣告片，繼續保持人氣。
只放上fb同YouTube
社交網絡興起之後，企業宣傳手法越來越廣，唔一定要落電視或報紙廣告。好似星展呢個推廣campaign，佢哋拍片放上fb同YouTube，都冇諗住剪段放落電視廣告。莊偉忠呢條片全長大約兩分鐘，以紀錄片形式講佢退休感想，大意係退休後，太太要搵銀行幫手理財。
聽星展方面講，佢哋總共搵來6位具有生活態度嘅名人拍片，莊偉忠係頭炮，其他包括港鐵（066）主席馬時亨大女馬露明、維港黃鴨策展人林樹鑫、潮牌B.Duck創辦人許夏林等。有幾多錢酬勞當然係秘密喇。
佢哋搵莊偉忠打頭陣，算係識得食住條水，事關莊偉忠近年成功打造好老闆形式，大家都知佢係「不開會嘅CEO」，形象好到不得了，又具人氣，佢上星期last day，離開工作8年嘅一田，最啱搵佢拍廣告講退休理財喇。不過佢唔算真退休，佢早前講過，會聽老婆話，「退休，但唔可以唔做嘢」，之後仲會有演講活動。
不過，講開呢條片，去到尾彈出一句口號：Live more, bank less，頭一句易明，第二句想講乜呢？星展方面解釋，意思係叫大家為生活而理財，並非為理財而生活喎，明唔明呀。
李華華
mailto:[email protected]
