受廢青熱捧的毛記電視昨晚慶祝開台一周年，於會展舉行「萬千呃Like賀台慶2016」，全場8000個座位坐滿，捧場嘉賓包括剛爆出有意參選今屆立法會的HKTV老闆王維基，另有邵仲衡、利嘉兒夫婦、譚小環夫婦、周家怡、林夕、河國榮及蒙嘉慧等人。
台慶8時36分開場，先由方健儀出場主持6點半左右新聞報道，還搞笑地一人分飾主播和記者，自己交咪給自己進行Live報道。而第一個表演節目是一班身穿紅色運動裝的大媽大叔齊齊在台上跳會展大媽舞，然後輪到三位司儀利君牙、盤菜螢子及黃慘盈出場進行亮燈儀式，最爆笑是主持儀式的人，是前亞視執行董事葉家寶，他以「毛記電視臨時特約一次性行政總裁」身份為台慶舉行切壽包儀式。
葉家寶：香港需要歡樂
葉家寶出場即引來全場拍掌歡呼，而他的簡單任務只是負責拉下插在大型壽包道具的刀柄。葉家寶返回後台受訪時笑說：「玩得好開心，佢哋搵咗我做一日行政總裁，覺得好有象徵意義。今日見到佢哋一班年輕人都好搞笑，香港好需要歡樂。」講到毛記以前經常拿亞視開玩笑，葉家寶說沒所謂：「OK嘅，無傷大雅，做媒體嘅冇得介懷咁多，咁緊張就冇得做嘅。媒體都係帶畀人歡樂。」
葉家寶續謂：「林日曦邀請我嚟嘅時候我都有考慮過，但睇過啲稿，覺得其實係幾開心，可以一齊玩，最緊要係正能量，如果以後有機會都想同毛記合作吓，最想就係唱《亞視永恆》，同河國榮PK吓！」
採訪、攝影：王連連、曹家誠、吳耀輝、馮嘉銘、沈健程
